天生快活林群团拜

今日6点几起身就训唔着，上网打下牌，睇下视频，睇到八点几就开始再次眼训，咁就睡咗大概半小时就洗澡出去，因为今日约咗无凌，静儿佢地过去石井玩，所以唔敢睡得太熟。 我十点左右去到无凌屋企楼下车站俾电话叫佢落嚟，佢落嚟，我地等咗好耐17号车先嚟，真喺俾佢激死啊！！~~ 坐车坐咗成个钟，我地先去到石井，再由静儿专车接送到食饭果间农庄。去到农庄，好好同招仔已经到左好耐，之前群嘅肥仔同非洲临时有事，所以无嚟~！！剩下洛洛一个未到，佢无端端坐错车，所以迟到。我地唯有一路打麻将，一路等啦。我一向好少打麻将，都系凳脚，唔输就算啦，无谂过赢。洛洛嚟到前，一铺都未食过胡，已经输咗一底啦！！洛洛嚟到之后，就开饭啦。果度嘅冬菇鸡脚唔错，烧鹅好香，蟹都ok！！ 食完当然要报仇啦！！赢返之前果D啦，今日运气都算好啦，食咗几铺自摸爆胡，唔喺输好多，输十几蚊姐，好好同静儿就输得多D，无凌买码都赢六十几蚊，招仔就做大赢家，一家赢三家，赢咗2百几蚊。 大概四点几打完就过去附近嘅草莓园摘草莓，听静儿讲，果度嘅草莓同帽峰山差好远，可能水土唔同，无咁甜。呢个又真喺事实，上次去大夫山果时，静儿带咗D俾我地食过，真喺甜好多。 摘咗4斤左右，10蚊一斤。之后去静儿屋企清洗一下，就食草莓。静儿屋企真喺大，同埋后花园居然有公园D阿伯健身果D设施，都唔知佢系唔系系人地公园偷返嚟嘅。呵呵~~~ 食完草莓就同无凌，静儿一齐过去中华广场睇电影，之前约咗vivian嘅，一共四条友去睇。我一个男带住三条女，都算巴闭，不过无一个系自己嘅。因为vivian果日仲要上班，要7点左右先到，所以我地就拣咗20：40果场，仲有成差唔多两个钟时间，我地就周围行下街先，无凌话想买只表俾佢老豆。睇中一只2千几的。我之前无戴表嘅情怀，但唔知点解最近我都开始追求一D比较小资嘅生活，虽然收入未达小资水平，但已经开始学人小资，未富先娇！！静儿同num都话认识朋友有折扣，所以我都打算等闲睇吓，如果适合都买一只戴下，型D啊嘛。 行完表行同CK，我地就去ten2食嘢，刚好vivian都系果个时候下班赶到。我好简单，叫咗个星洲炒米就算数，嘢都无叫到饮。食完，吹咗一阵水，又去逛街，三个女人都系睇女装多，我完全无嘢讲，收晒声。静儿仲系周大福果度买咗只耳环，几高雅嘅，925纯银，2百几。 差唔多够时间我地就上返去电影院，买咗D爆谷，一D嘢饮就入场。《游龙戏凤》刘德华，舒淇做嘅。睇完感觉点样我会喺另外一篇日记交代，睇完就各自回家，我同无凌，vivian坐地铁回家。静儿就揸车回家。成日行程基本就甘样。